Ўзбекистон Давлат хавфсизлик хизмати Фарғона вилояти бошқармаси ходимлари халқ депутатлари Данғара тумани кенгаши депутати Муҳайё Қодировани товламачилик бўйича ҳибсга олди.
«Халқ депутатлари Данғара тумани кенгаши депутати, Қўқон давлат педагогика институти методисти лавозимида ишловчи Муҳайё Қодирова таниши Машҳура Абдураҳимова билан пул эвазига абитуриентларни ўқишга киритиш ҳақида жиноий тил бириктирган», – дейилади «Ўзбекистон-24» дастурида намойиш этилган лавҳада.
Хабар берилишича, аёллар Бешариқ туманида яшовчи фуқародан унинг жиянларини Қўқон давлат педагогика институтига киритиб қўйишни ваъда қилиб ундан 7 минг доллар талаб қилишган.
Шунингдек, улар яна бир фуқародан Қўқон тиббиёт институтига ўқишга киришда ёрдам беришни ваъда қилиб, 800 доллар пул сўрашган.
Натижада ҳар икки аёл 7800 доллар пулни олишаётганида қўлга тушишди. Хабар берилишича, уларга нисбатан жиноий иш қўзғатилган, тергов ишлари олиб борилмоқда.