$50 минг пора билан қўлга тушган прокуратура терговчисига ҳукм ўқилди

17.08.2022 STOP КОРРУПЦИЯ2 045

Яшнобод туман суди 50 минг доллар пора билан ушланган Учтепа тумани прокуратураси терговчисини 13 йил муддатга озодликдан маҳрум қилди, деб хабар берди Тошкент шаҳар судлари матбуот хизмати.

Аввалроқ ДХХнинг Тошкент шаҳар бошқармаси томонидан Тошкент шаҳар прокуратураси билан ҳамкорликда ўтказилган тадбирда Учтепа тумани прокуратураси терговчиси 50 минг долларни пора тариқасида олаётган вақтида қўлга олингани хабар берилган эди.

Маълум бўлишича, у мазкур маблағни қурилиш-таъмирлаш ишларига ихтисослашган масъулияти чекланган жамиятининг мансабдор шахсларига нисбатан қўзғатилган жиноят иши доирасида, ушбу жамият раҳбарига нисбатан қамоққа олиш тарзидаги эҳтиёт чорасини қўлламаслик эвазига талаб қилган.

Ҳолат юзасидан гумондор Жиноят ишлари бўйича Яшнобод туман суди томонидан Жиноят кодексининг 210-моддаси (пора олиш) 3-қисмининг «а» бандида назарда тутилган жиноятни содир этганликда айбдор деб топилди. Унга Жиноят кодексининг 45-моддасига (муайян ҳуқуқдан маҳрум қилиш) асосан уч йил муддатга мансабдорлик лавозимларида ва прокуратура идораларида ишлашдан маҳрум қилинган ҳолда 13 йил муддатга озодликдан маҳрум қилиш жазоси тайинланди.