Президентнинг 19.09.2025 йилдаги «Коррупцияга қарши курашиш соҳасида фуқаролик жамияти институтларининг иштирокини янада кенгайтириш ва илмий тадқиқотларни қўллаб-қувватлаш чора-тадбирлари тўғрисида»ги ПҚ-288-сон қарори қабул қилинди.
Устувор вазифалар:
коррупцияга қарши курашиш фаолиятида илмий ташкилотлар ва фуқаролик жамияти институтларининг ролини ошириш;
коррупцияга қарши курашиш чораларининг самарадорлиги ва натижадорлигини ҳар бир соҳа ва ҳудуд кесимида таҳлил қилиш тизимини жорий этиш;
коррупцияга қарши курашишга етакчи маҳаллий ва хорижий олий таълим муассасалари ҳамда илмий-тадқиқот институтларини кенг жалб этиш;
коррупцияга қарши курашиш масалалари бўйича комплекс социологик, илмий ва амалий тадқиқотларни тизимли асосда, шу жумладан миллий ва халқаро грантларни жалб этган ҳолда олиб бориш;
илмий тадқиқотлар натижаларини амалиётга жорий этиш.
Ҳужжатда қуйидаги чоралар амалга оширилиши белгилаб қўйилди:
ННТларни БМТнинг Коррупцияга қарши конвенцияси қоидаларининг бажарилишини мониторинг қилишга жалб этиш ва улар томонидан муқобил баҳолаш тизимини жорий этиш;
коррупцияга қарши курашиш соҳасидаги ННТ лойиҳаларига йилига 10 млрд сўм миқдорида грантлар ажратиш ва ижтимоий буюртмалар бериш;
маиший коррупцияга хисса қўшувчи омиллар бўйича ижтимоий сўровлар ўтказиш.
ННТларнинг Миллий ассоциацияси, «Юксалиш» ҳаракати ва «Ижтимоий фикр» республика марказининг муассислигида «Коррупцияга қарши курашиш муаммолари бўйича минтақавий тадқиқот маркази» ННТ ташкил этилади, у давлат ва жамият ҳаётининг барча соҳаларида ҳалоллик стандартларини жорий этиш, давлат органлари ва бошқа ташкилотларга илмий-услубий кўмак кўрсатиш билан шуғулланади.
Коррупцияга қарши курашиш соҳасида фуқаролик жамияти институтларининг иштирокини янада кенгайтириш ва Коррупцияга қарши курашиш муаммолари бўйича минтақавий тадқиқот марказининг фаолиятини самарали ташкил этиш бўйича «Йўл харитаси» тасдиқланди.
Ҳужжат Қонун ҳужжатлари маълумотлари миллий базасида давлат тилида эълон қилинган ва 20.09.2025 йилдан кучга кирди.
