Ер участкаларини сотиш тартиби соддалаштирилди

Ҳужжат қуйидагиларга қаратилган:

• ҳудудларда тадбиркорлик ва шаҳарсозлик фаолиятини амалга ошириш учун берилаётган қишлоқ хўжалигига мўлжалланмаган ер участкалари устидан назорат жараёнини такомиллаштириш;

• аукционларда ижара ҳуқуқи билан сотиб олинадиган ер участкаларини бирлаштириш имкониятини яратиш;

• ер-ҳуқуқий муносабатларда барқарорликни таъминлаш;

• кичик саноат зоналари ҳамда ёшлар саноат-тадбиркорлик зоналарида инвестиция муҳитини янада яхшилаш.

Хусусан, аҳолига давлат хизматлари кўрсатиш тизимини ислоҳ қилиш, ортиқча бюрократик тўсиқларни бартараф этиш, фуқаролар учун қулай шароитлар яратиш, замонавий кўп квартирали турар жойлар қуриш кўламини янада кенгайтириш учун қуйидагилар белгиланди:

• кичик саноат зоналари ва ёшлар тадбиркорлик зоналари (ЁТЗ) ҳудудида жойлашган ер участкаларини электрон онлайн-аукционларда сотишда саноат зоналари дирекциялари буюртмачи деб тан олинади;

• олис ва чўл ҳудудларда ташкил этилаётган ЁТЗ рўйхати Қорақалпоғистон Жўқорғи Кенгеси ва вилоят халқ депутатлари кенгашлари қарорлари билан тасдиқланади, улар зарурат туғилганда унга тегишли ўзгартиш ва қўшимчалар киритадилар.

2025 йил 5 сентябрдан бошлаб олис ва чўл ҳудудларда жойлашган ЁТЗ ҳудудидаги бўш ер участкалари 1 сўм нархида электрон онлайн-аукционга чиқарилади.

«Yerelektron» автоматлаштирилган ахборот тизимида «Олис ва чўл ҳудудларда жойлашган ЁТЗдаги бўш ер участкалари» алоҳида бўлими яратилади.

Кўп квартирали турар жойлар қуриш учун ер участкаларини ижарага бериш бўйича аукцион ғолиби туман (шаҳар) ҳокимияти билан «Электрон аукционларни ташкил этиш» АЖда рўйхатга олинадиган электрон шартнома (оферта) тузади ва қуйидаги муддатларни назарда тутади:

• кўп квартирали турар жойлар қуриш учун аукционда сотилган ер участкалари бўйича лойиҳаолди ҳужжатларни тайёрлаш учун 15 кун;

• лойиҳа ишларини бажариш учун 2 ой ва қурилиш ишларини бошлаш учун 3 ой;

• ер участкасида қурилиши режалаштирилган объектни фойдаланишга топшириш.

Аукцион таклифи талаблари бажарилмаганда ер участкаси белгиланган тартибда қайтариб олинади ва такрор савдоларга чиқарилади.

Шунингдек, тадбиркорлик фаолияти ва шаҳарсозлик мақсадларида электрон онлайн-аукционларда реализация қилинадиган ер участкаларида қурилиш ишлари бошланганидан уларни фойдаланишга топширилгунига қадар барча жараён босқичларини «Онлайн маҳалла» электрон платформасида мониторинг қилиш тизими жорий этилади.

Ҳужжат билан Давлат картографик-геодезик кадастрини юритиш тартиби тўғрисидаги Низом (15.11.2005 й. 250-сон ВМҚ билан тасдиқланган) ва ҳукуматнинг бошқа ҳужжатларига қуйидагиларни назарда тутувчи ўзгартириш ва қўшимчалар киритилди:

• кадастр соҳасида давлат хизматларини Кадастр агентлигининг веб-сайти орқали кўрсатиш;

• кадастр йиғмажилдини тузиш ва унинг натижалари бўйича кадастр паспортини олиш учун тақдим этиладиган ҳужжатлар рўйхатини амалдаги қонун ҳужжатларига мувофиқлаштириш;

• ер участкаларини электрон онлайн-аукционларга чиқариш тартибини янада такомиллаштириш.

Ҳужжат Қонун ҳужжатлари маълумотлари миллий базасида давлат тилида эълон қилинган ва 04.09.2025 йилдан кучга кирди.