Мажбурий тиббий кўрик қамоққа олинганлар тергов ҳибсхонасига олиб келинган пайтдан эътиборан 2 соат ичида тиббий ходим томонидан ўтказилади.
Қамоққа олинганни мажбурий тиббий кўрикдан ўтказишда тергов ҳибсхонасининг у билан бир жинсда бўлган ходими иштирок этади.
Мажбурий тиббий кўрикни ўтказишда қамоққа олинганнинг розилиги билан унинг адвокати ҳам иштирок этиши мумкин.
Мажбурий тиббий кўрикдан ўтказиш натижалари бўйича тиббий маълумотнома расмийлаштирилади, унинг бир нусхаси қамоққа олинган билан имзо қўйдириб таништирилганидан кейин унинг шахсий ишига қўшиб қўйилади, иккинчи нусхаси қамоққа олинганни олиб келган ходимларга топширилади. Тиббий маълумотноманинг кўчирма нусхаси қамоққа олинганнинг ёки унинг адвокатининг талабига асосан тегишинча қамоққа олинганга ёки унинг адвокатига тақдим этилади.
Мажбурий тиббий кўрик чоғида қамоққа олинганнинг танасида шикастланишлар, жароҳатлар ва яралар аниқланган тақдирда, улар белгиланган тартибда қайд этилиб, бу ҳақда қамоққа олинганга маълум қилинади ва зудлик билан прокурорга хабар берилади.
Ҳужжат Қонун ҳужжатлари маълумотлари миллий базасида эълон қилинган ва 28.09.2025 йилдан кучга киради.
