Ташқи ишлар вазирлиги Матбуот хизмати Қозоғистон чегарасида бўлиб турган 3700 дан ортиқ Ўзбекистон фуқаролари Қозоғистон – Ўзбекистон чегарасини кесиб ўтганини маълум қилди.
Қайд этилишича, жоий йил 1 июлдан 7 июлгача бўлган муддатда «Жибек жоли» – «Ғишт-Кўприк» назорат-ўтказиш пункти орқали 2700 нафардан ортиқ аҳоли вакиллари Ўзбекистонга қайтган. Бироқ юзага келган техник муаммолар туфайли Қозоғистон-Ўзбекистон чегарасидан ўзбекистонликларни ўтказиш чекланган миқдорда амалга оширилди. Оқибатда бу ҳолат чегарада 3000 га яқин Ўзбекистон фуқаролари тўпланиб қолишига сабаб бўлган.
Республика махсус комиссияси, ДХХ Чегара қўшинлари ва Ўзбекистоннинг Қозоғистондаги дипломатик ваколатхоналарининг биргаликдаги саъй-ҳаракатлари натижасида 8 июл куни фуқароларнинг Қозоғистон – Ўзбекистон чегарасидан эркин ўтишига тўсқинлик қилувчи барча техник ва ташкилий масалалар тезкорлик билан ҳал қилинди.
Ўзбекистон Ташқи ишлар вазирлиги Оператив штаби маълумотларига кўра, 2020 йил 8 июл куни кечқурун ва 9 июл куни «Жибек жоли» – «Ғишт-Кўприк» назорат-ўтказиш пунктидан 3746 нафар ўзбекистонлик ўтказилди.
Эслатиб ўтамиз, Ўзбекистон фуқаролари қайтиб келгандан кейин Республика махсус комиссияси томонидан белгиланган талабларга қатъий риоя қилган ҳолда 14 кунлик карантинга жойлаштирилади.
