Вазирлар Маҳкамасининг 01.07.2025 йилдаги «Ногиронлиги бўлган шахсларнинг бандлигини қўллаб-қувватлашнинг қўшимча чора-тадбирлари тўғрисида» 405-сон қарори қабул қилинди.
Ҳужжат билан Ногиронлиги бўлган шахслар бандлигини таъминлашга кўмаклашиш, уларнинг бандлигини таъминлаш ҳамда меҳнат қилишини қўллаб-қувватлаш тартиби тўғрисидаги низом тасдиқланди.
Низом электрон реестрни юритиш, имкониятлари чекланган шахсларнинг меҳнат ҳуқуқларини рўёбга чиқаришга кўмаклашиш, улар ва иш берувчилар ўртасида алоқа ўрнатиш, шунингдек I ва II гуруҳ ногиронлиги бўлган шахсларни ишга қабул қилган тадбиркорлик субъектларига субсидиялар бериш тартибини белгилайди. Ижтимоий ҳимоя миллий агентлиги «Ягона миллий ижтимоий ҳимоя» ахборот тизимида «Ногиронлиги бўлган шахслар бандлигига кўмаклашиш электрон реестри» ахборот модулини юритади.
Реестрда ногиронлиги бўлган шахсларнинг таълими ва меҳнат фаолияти ҳақидаги маълумотлар сақланади, улар билан тадбиркорлар – иш берувчилар танишиб чиқиши мумкин.
Иш билан банд бўлишни истаган ногиронларни электрон реестрга киритиш «Инсон» ижтимоий хизматлар марказлари ва Ягона интерактив давлат хизматлари портали орқали топширилган уларнинг ариза асосида амалга оширилади.
Субсидиялар I ва II гуруҳ ногиронлиги бўлган шахсларни ишга қабул қилган ёки уларни ишга қабул қилишда кўмаклашган тадбиркорлик субъектларига уларни камида уч ой давомида расмий иш билан таъминлаш ва МҲТЭКМнинг 2 бараваридан кам бўлмаган иш ҳақи тўлаш шартида ажратилади.
Бундан ташқари I ва II гуруҳ ногиронлиги бўлган шахсларни ишга қабул қилган тадбиркорлик субъектларига сурдотаржимон, психолог ва ҳамроҳлик хизматларини ташкил этиш харажатларини қоплаш учун субсидия ажратилади.
Субсидия олиш учун тадбиркор белгиланган шаклдаги ариза ва ҳужжатлар билан «Ягона миллий ижтимоий ҳимоя» АТ ёки ЯИДХП орқали мурожаат қилиши керак.
Ҳужжат Қонун ҳужжатлари маълумотлари миллий базасида эълон қилинган ва 03.07.2025 йилдан кучга кирди.
