Президент Шавкат Мирзиёев 2021-2022 йилларда электр энергияси нархини оширмасликни буюрган. Бу ҳақда “Ҳудудий электр тармоқлари” АЖ раиси Улуғбек Мустафоев “Ўзбекистон 24” телеканалига берган интервьюсида маълум қилди.
“Президент 2021-2022 йилларгача электр энергияси тарифини оширмасликни белгилаб берди. Буни амалга ошириш учун ҳар бир компанияга, шу жумладан “Ҳудудий электр тармоқлари” АЖ олдига бир қатор вазифаларни қўйди. Қилинадиган модернизация ва реконструкция ишларини амалга оширишда тарифни ошириш ҳисобига эмас, балки ишлаб чиқаришга кетадиган харажатларни яъни таннархини камайтириш эвазига эришиш масаласини қўйди” – дейди “Ҳудудий электр тармоқлари” АЖ раиси Улуғбек Мустафоев.
Унинг сўзларига кўра, АЖнинг олдида бошқарув тизимини такомиллаштириш, SMART-тизими, биллинг ва ERP-тизимини кенг татбиқ этиш масаласи асосий вазифалар ҳисобланади.
