Ер – миллий бойлик, уни муҳофаза қилиш – барчамизнинг муҳим бурчимиздир.
Инсоният ҳаётининг барча жабҳалари ер билан бевосита боғлиқ. Унинг ҳар бир қаричи –ризқ манбаи, ҳаёт макони, истиқбол гаровидир. Ана шундай муқаддас неъмат – ер майдонларини аниқ ҳисобга олиш, муҳофаза қилиш ва самарали бошқариш бугунги кунда долзарб масалалардан биридир.
Кейинги йилларда давлатимиз томонидан ер муносабатларини тартибга солиш, қонунбузарликларни олдини олиш ҳамда кадастр тизимини такомиллаштириш бўйича бир қатор ислоҳотлар амалга оширилди. Бу борада Кадастр агентлиги зиммасига юкланган вазифаларни сифатли адо этиш мақсадида замонавий ёндашувлар, рақамли технологиялар ва назоратнинг янги механизмлари жорий этилмоқда.
Ўзбекистон Республикаси Президентининг 2022-йил 21-февралдаги “Ер участкаларидан фойдаланишда давлат назорати самарадорлигини ошириш чора-тадбирлари тўғрисида”ги ПҚ-138-сонли Қарори ижросини таъминлаш мақсадида вилоятда ер қонунбузилиш ҳолатларининг олдини олиш, уларни ўз вақтида аниқлаш ва бартараф этиш юзасидан белгиланган чора-тадбирлар доирасида муайян ишлар амалга оширилмоқда.
Кадастр агентлиги Фарғона вилояти бошқармаси тизимида амалга оширилган ишларга назар ташлаймиз. Жумладан, 2025-йил 1-август кун ҳолатига бўйича 4984 та ҳолатда жами 264,1 гектар ер майдонларини ўзбошимчалик билан эгаллаб олинганлиги аниқланган.
Ушбу ҳолатлар юзасидан Кадастр агентлиги органлари томонидан ер қонун бузилиш ҳолатларини содир этган шахсларга нисбатан бартараф этиш юзасидан ёзма кўрсатмалар юборилиб, 4067 та ҳолатда ёки 210,1 гектар ер майдонларида йўл қўйилган қонунбузилиш ҳолатлари жойида бартараф этилган.
Ер қонунбузилиши ҳолатларини содир этган айбдор шахслар томонидан қурилган қурилишларни буздириш ҳамда ер майдонларини туман захирасига қайтариш мақсадида 745 та ёки 42,2 гектар ҳолатда судларга даъво аризалар киритилиши таъминланди.
Жиноят аломатлари мавжуд ҳуқуқбузарлик ҳолатлари юзасидан 75 та ёки 12,9 гектар ҳолат эса прокуратура органларига тўпланган ҳужжатлар Қўшма тартиб асосида тақдим этилди.
Ер участкаларидан мақсадсиз фойдаланиш ҳолатлари юзасидан ўтказилган назорат тадбирларида вилоят бўйича 719 та жисмоний ва юридик шахслар томонидан 1 672,7 гектар ер участкаларидан мақсадсиз фойдаланиш ҳолатлари аниқланиб, мақсадсиз фойдаланилган ер майдонларини давлат захирасига қайтарилиш мақсадида туман шаҳар ҳокимликларига 719 та тақдимномалар киритилиб, шундан, 707 та ҳолатда мақсадсиз фойдаланган ер участкалари давлат захирасига қайтарилиши таъминланди.
Нодирбек Машрапов, Кадастр агентлиги Фарғона вилоят бошқармаси бошлиғи.
