Лойиҳа йўл ҳаракати қоидаларини бузиш билан боғлиқ маъмурий ишларни расмийлаштириш, кўриб чиқиш ҳамда фуқаролар ва юридик шахсларнинг шу масалаларга оид мурожаатларини кўриб чиқиш тартибини белгилайди. Ҳужжатга кўра, маъмурий ишларни юритиш электрон шаклга ўтказилади.

Маъмурий ишлар электрон шаклда юритилади

Лойиҳада ИИВ Жамоат хавфсизлиги департаменти Йўл ҳаракати хавфсизлиги хизмати Ягона автоматлаштирилган ахборот тизимининг “Маъмурий амалиёт” модули асосий электрон платформа сифатида белгиланмоқда.

У орқали маъмурий ишлар электрон шаклда расмийлаштирилади, ҳуқуқбузар, жабрланувчи, гувоҳ ва холислар ҳақидаги маълумотлар жамланади ҳамда идоралар ўртасида ахборот алмашинуви амалга оширилади. Маъмурий иш ҳужжатлари, жумладан, далиллар судларга ҳам электрон шаклда юборилиши кўзда тутилган.

Фуқаролар исталган ҳудудий марказга мурожаат қилиши мумкин

Лойиҳада йўл ҳаракати қоидабузарликлари билан боғлиқ мурожаатларни кўриб чиқишда “ягона дарча”, “экстерриториаллик” ва open space тамойилларини қўллаш назарда тутилган.

“Экстерриториаллик” тамойилига кўра, фуқаро доимий ёки вақтинча рўйхатдан ўтган жойидан қатъий назар, исталган ҳудудий марказга мурожаат қилиши мумкин. “Ягона дарча” тамойили давлат хизматларини бир нуқтада кўрсатишни, open space эса мурожаатчилар учун тўғридан-тўғри ва тўсиқсиз кириш имконини англатади.

Мурожаатлар Марказ ва ҳудудий марказларда ҳар куни иш вақтида кўриб чиқилади. Фуқаролар махсус ахборот қурилмалари орқали электрон навбат олиб, мурожаат шаклини танлаши ва зарур маълумотларни киритиши мумкин бўлади.

Қоидабузарликни тасдиқлашда фото ва видеолардан фойдаланилади

Маъмурий баённомани расмийлаштиришда ЙҲХХ ходимлари планшет ёки бошқа мобил қурилмалардаги аудио ва видеоёзувлар, фотосуратлар, техник экспертиза хулосалари, ўлчаш воситалари далолатномалари ва бошқа маълумотлардан фойдаланиши мумкин.

Агар ҳуқуқбузарликни тасдиқлашда махсус автоматлаштирилган қурилмалардан бошқа мобил қурилма ишлатилса, ходим қурилма ҳақидаги маълумотни ва ундан фойдаланиш заруратини тушунтириши ҳамда ҳуқуқбузарни огоҳлантириши керак.

Камера орқали қайд этилган қоидабузарликлар 48 соат ичида текширилади

Махсус автоматлаштирилган фото ва видео қайд этиш воситалари орқали аниқланган қоидабузарликлар ҳудудий марказ ходимлари томонидан кўриб чиқилади.

Бундай маълумотлар ҳудудий марказга 48 соат ичида келиб тушган бўлиши керак. Агар маълумот белгиланган муддатда келиб тушмаса, маъмурий иш кўриб чиқилмайди ва тугатилади.

Шунингдек, камера орқали қайд этилган қоидабузарликлар бўйича маъмурий жазо ҳуқуқбузарлик содир этилган кундан бошлаб бир ойдан кечиктирмай қўлланиши мумкин. Агар қарор устидан шикоят берилса, бу муддат бир йилгача узаяди.

Жарима ҳақидаги қарор электрон шаклда ҳам олинади

Фуқаролар маъмурий жазо қўллаш тўғрисидаги қарорни ejarima.uz, Ягона интерактив давлат хизматлари портали ёки ИИВ ЙҲХХ мобил иловасидаги шахсий кабинети орқали олишлари мумкин.

Агар фуқаро қарордан норози бўлиб, судга мурожаат қилса, маъмурий иш ҳужжатлари “Маъмурий амалиёт” модули орқали тегишли судга юборилиши таъминланади.

Лойиҳа ҳали амалдаги тартиб эмас. Ҳужжат жамоатчилик муҳокамасига қўйилган бўлиб, ундаги қоидалар лойиҳа шаклида таклиф этилмоқда. Буйруқ тасдиқланадиган бўлса, у расмий эълон қилинган кундан эътиборан кучга кириши белгиланган.