Фирибгарликка учраб, Хорватияда пулсиз қолиб кетган икки фуқаро Ўзбекистонга қайтарилди. Бу ҳақда “Дунё” агентлиги хабар берди.
Маълум қилинишича, уларни хусусий бандлик агентлиги фирибгарлик йўли билан алдаган. Ишга жойлашиш мақсадида чет элга келган фуқаролар фирибгарлар тузоғига тушганини кейин англаб етган. Оқибатда улар ишсиз, пулсиз оғир аҳволда қолиб кетган.
Шу боис улар Ўзбекистонга қайтиши учун авиачипта сотиб олишда молиявий ёрдам сўраб мурожаат қилган. Юзага келган вазиятни инобатга олган ҳолда элчихона томонидан Ўзбекистон Ташқи меҳнат миграцияси агентлиги билан ишчи алоқалар ўрнатилган.
Ўтказилган суриштирув ва келишувлар натижасида Ўзбекистон Меҳнат мигрантларини қўллаб-қувватлаш ва уларга кўмаклашиш жамғармаси маблағлари ҳисобидан мурожаатчиларга авиачипталар сотиб олиниб, уларнинг ватанга қайтишига ёрдам берилган.
