Олий Мажлис Қонунчилик палатасининг 9 сентябрь куни бўлиб ўтган мажлисида шахсларнинг тасвирга бўлган ҳуқуқлари ҳимоясини кучайтиришга қаратилган қонун лойиҳаси биринчи ўқишда қабул қилинди.
Таъкидланишича, бугунги жадал ахборот-коммуникация даврида шахсларнинг тасвиридан фойдаланиш билан боғлиқ муносабатларда шахсий дахлсизлик ҳуқуқи амалга ошириш механизмлари билан таъминланмагани сабабли айрим ҳолларда чекланмоқда.
Қонун лойиҳаси билан шахсни тасвирга олиш ва ундан фойдаланиш учун розилик олиш мажбурийлиги, ушбу ҳуқуқдан болалар ҳам эркин фойдаланиши ҳамда тасвирга олиш ва ундан рухсатсиз фойдаланиш мумкин бўлган ҳолатлар доираси белгиланмоқда.
Лойиҳага билан видеокузатув тизимларидан фойдаланишда шахсий ҳаёт дахлсизлигини таъминлаш бўйича талаблар белгиланмоқда. Хусусан, бино ва иншоотларда видеокузатув камералари ўрнатилган бўлса, бу ҳақда албатта тегишли огоҳлантириш жойлаштирилиши шарт бўлади.
Шу билан бирга, ҳужжатда тасвирдан рухсатсиз фойдаланишнинг ҳуқуқий оқибатлари белгиланиб, меҳнат муносабатларида тасвирдан фойдаланиш билан боғлиқ қоидаларга аниқлик киритилган.
