Вазирлар Маҳкамасининг 28.03.2025 йилдаги «Давлат архитектура назоратини амалга оширишнинг янги механизмини жорий қилиш чора-тадбирлари тўғрисида»ги 192-сон қарори қабул қилинди.
Ўзбошимчалик билан қурилган бино ва иншоотларни аниқлаш ҳамда бартараф этишда давлат архитектура назоратини амалга ошириш тартиби тўғрисидаги низом тасдиқланди ва унинг кучга кириш санаси 27.06.2025 йил этиб белгиланди.
Жисмоний ва юридик шахслар ўзбошимчалик билан қурилган (қурилаётган) бино ва иншоотларни видеотехника воситалари орқали қайд этиб фото ва видео материалларни Қурилиш ва уй-жой коммунал хўжалиги вазирлиги ёки унинг ҳудудий бошқармаларига кўриб чиқиш учун «Огоҳ фуқаро» платформаси орқали юборишлари мумкин.
Ваколатли орган давлат архитектура назорати тадбирларини ўтказишда ўз ваколатлари доирасидан четга чиқмаслиги ва назорат предметига тааллуқли бўлмаган ҳужжатларни (ахборотни) талаб қилмаслиги керак.
Бино ва иншоотни ўзбошимчалик билан қурган шахс уни 15 сутка ичида ўз ҳисобидан бартараф этиши шарт.
Кўрсатилган муддат тугагач, ваколатли орган судга бино ёки иншоотни мажбурий бузиб ташлаш тўғрисида даъво аризаси киритади.
Ҳужжат Қонун ҳужжатлари маълумотлари миллий базасида эълон қилинган ва 29.03.2025 йилдан кучга кирди.
