Ўзбекистон «Миллий тикланиш» демократик партияси марказий кенгаши раиси Сарвар Отамуродов шанба куни «Ҳаракатлар стратегияси» марказида бўлиб ўтган очиқ мулоқот вақтида Халқ таълими, Маданият вазирликлари ва Ёшлар иттифоқи фаолиятини танқид қилди.
ЎзАнинг хабар қилишича, Сарвар Отамуродов авваллари сиёсий партияларни ҳеч ким тан олмагани, тузук гаплашмаганини тан олди, бироқ партияларнинг тарғибот-ташвиқоти билан боғлиқ муаммолар мавжудлигини айтиб ўтди.
«Икки кун аввал мен кўрдим, „Сиёсий партиялар нима иш қилаяпти, нимани ҳал қилишди?“, „Умуман партиялар нима керак ўзи?“ каби саволларни. Тан олиш керак, сўнгги икки йил ичида ҳаёт умуман ўзгариб кетди. Очиғини айтаман, олдинлари сиёсий партияларни ҳеч ким тан олмасди, тузук гаплашмасди. Ҳозир эса ҳафтасига камида 2−3 та муаммо, масалалар кўтарилган хат вазирлик, идораларга кетяпти. Лекин бизнинг битта муаммомиз бор: тарғибот-ташвиқотимиз жуда бўш, суст», — деди Ўзбекистон президентлигига собиқ номзод.
Унинг сўзларига кўра, Маданият вазирлиги маданий мерос объектларига оид нотўғри статистик маълумотларни тақдим этмоқда.
«Ўтган йили биз республика бўйича маданий мерос объектларини инвентаризация қилдик. Аслида бу ишни Маданият вазирлиги қилиши керак эди. Улар бюджетдан бу иш учун пул олади, аммо қилмаган. Вазирлик қаерда нима жойлашганини ҳам яхши билмайди, маданий мерос объектлари жойлашуви бўйича берган маълумотларнинг 30−40 фоизи нотўғри, объектларнинг баъзилари бузилиб кетган. Вазирлик маълумотига қарасак, республикада тахминан 7480 та объект бор, аслида улар 6975 та. Қолганлари-чи? Йўқ, жойи теп-текис, асфальт ётқизилган ёки умуман бузилиб кетган», — деди у.
Бундан ташқари, партия 370 та янги маданий объектни аниқлади. «Бу йил ҳукуматга масала қўйдик, бу ишлар учун аввал ажратилаётган 50 миллиард пулни 67 миллиардга чиқардик. Маҳаллий бюджет харажатларидан ортган пулнинг бир қисмини мазкур муаммоларни ҳал этишга йўналтириш бўйича қарор қабул қилдик».
Сарвар Отамуродов кўплаб тарихий ёдгорликларнинг кадастр ҳужжатлари йўқлигини қайд этиб ўтди. «Мисол учун, Сурхондарё вилоятида жойлашган XVI асрда қурилган қадимий Абдулазизхон мадрасасини омборхона қилиб қўйишган. Партиямиз вакилари билан бу ҳудудни топиб, ўрганиб, расмлар, хулосаларни Маданият вазирлигига топширдик, ҳозирда бу борада ишлар олиб борилмоқда. Йил охиригача бу муаммо ҳал этилиши керак» — деди у.
«Миллий тикланиш партияси раҳбари Халқ таълим вазирлиги фаолиятида ҳам қатор камчиликлар борлигини таъкидлаб ўтди. «Миллий тикланиш» демократик партияси вакиллари Сирдарё, Самарқанд, Фарғона, Тошкент вилоятларидаги тарбияси оғир болалар учун мўлжалланган 4 та махсус мактабга бориб вазиятни ўрганган.
«Аҳвол криминал бўлиб ётибди, давлат бюджетидан ажратилган пуллар талан-тарож. Ўзи шундоқ ҳам хулқи ёмон болалар орасида муҳит жуда ачинарли, ҳомиладор ёш қизлар бор, у шароитларда одам яшай олмайди. Мактабни битираман, деб турган ёшлар ҳарф танимайди, ўз исмини ҳам ёза олмайди. Бу жуда ачинарли, вазиятни ўрганиб бошимиз қотиб қолди. Қани бу ерда Халқ таълим вазирлигининг масъулияти, нега бу муаммоларга етиб боришмаяпти? Бу саволларга жавоб сўрайдиган вақт ҳам келди. Биз бу махсус мактаблардаги муаммоларни ҳукумат, бош вазир даражасигача олиб чиқдик, прокуратура органлари ҳам шуғулланди. Ҳозир бироз бўлса-да вазият яхшиланмоқда», деди Сарвар Отамуродов.
Партия марказий кенгаши раисининг айтишича, Ёшлар иттифоқининг ҳам тақдим этаётган айрим статистикалари реал ҳаётга мос келмайди, амалда бу кўрсаткичлар умуман бошқача.