Биз истиқомат қиладиган уйда турли хил корхоналар ўз рекламаларини (қоғозда) кўп квартирали уйимизнинг эшиклари ва подъездларимизга ёпиштириб кетишади. Уй-жой мулкдорлари ширкати ёки уй-жой эгалари судга мурожаат қилиб, бундай амалиётга чек қўйишимиз мумкинми?
С. Арипова, Наманган шаҳри.
ЖАВОБ:
Реклама-бевосита ёки билвосита фойда (даромад) олиш мақсадида юридик ёки жисмоний шахслар, маҳсулот, шу жумладан товар белгиси, хизмат кўрсатиш белгиси ва технологиялар тўғрисида ҳар қандай шаклда ва ҳар қандай воситалар ёрдамида қонун ҳужжатларига мувофиқ тарқатиладиган махсус ахборот (“Реклама тўғрисида”ги қонуннинг 4-м., кейинчалик – Қонун).
Фикримизча, агар реклама буклетлари хусуий уй-жой мулкдорлари ширкатининг (ХУЖМШ) умумий мулкида жойлаштирилса, ХУЖМШ розилиги керак. Кўп квартирали уйнинг умумий жойлари, таянч ва тўсиқ конструкциялар, квартиралар оралиғидаги иҳоталанган (ўралма) пиллапоялар, зинапоялар, лифтлар, лифтнинг шахталари ва бошқа шахталар, дахлизлар, техник қаватлар, ертўлалар, чердаклар ва томлар, уй ичидаги муҳандислик тармоқлари ва коммуникациялари, жойлар ташқарисида ёки ичида жойлашган ва биттадан ортиқ жойга хизмат кўрсатадиган механик, электр, санитария-техника ускуналари ва қурилмалари ҳамда бошқа ускуналар ва қурилмалар умумий мол-мулк ҳисобланади (“Хусусий уй-жой мулкдорларининг ширкатлари тўғрисида”ги қонуннинг 28-м.).
Демак, бундай рекламани жойлаштириш учун рекламани тарқатувчи ХУЙМШ билан шартнома тузиши керак.
Агарда, реклама буклетлари кўп квартирали уйнинг хонадонлари эшикларига жойлаштирилса ХУЖМШ розилиги керак эмас, чунки улар ҳар бир хонадон эгасининг мулки ҳисобланади.
Реклама тарқатувчи реклама тўғрисидаги қонун ҳужжатларининг рекламани тарқатиш вақти, жойи ва воситаларига тааллуқли қисми бузилганлиги учун жавобгар бўлади (Қонуннинг 28-м.).
Саволга ҳуқуқшунос Камолиддин Тилябоев жавоб берди.
